Bruno macht Reiden "great again"

Bolitik, Bruno, Badi: Die drei B waren bei den Schnitzelbänklern Trumpf. Doch nicht nur – schliesslich lieferte ihnen die Wiggertaler Metropole heuer sehr, sehr viel Stoff für ihre Verse.

Stefan Bossart

Um es vorwegzunehmen. Trotz einem «struben» Jahr, haben es die Reider nicht verlernt zu lachen. Wiiberhögge, Latzhosen, Plaudertäschen, WC-Enten und Giftspritzen sorgten dafür. Nicht zuletzt, indem sie Internationale Themen gekonnt in regionale Begebenheiten einflochten. Hier ein paar Müsterchen:

 

Ploudertäsche:

De Donald Trump ond sini Spröch – die tüe eim rechtig gruuse,
ond trotzdem werd är för 4 johr – im Wiise Hus go pfuse.
Im Gmeindhus Reide esch das gliich- mer hend es riese Schwein,
det herrscht de Bruno Ächerli – makes Reide great again. 

*****

Johrelang hends bohret ond – den händs sis ändlech gschafft,
e Tunnelbohmaschine bruchts – die hett di nötig Chraft
d Frou Leuthard fröits, de stolz esch gross ond – s Fäscht esch ned bescheide
doch grösser aus de Gotthard esch – s Finanzloch do in Reide.

*****

Es esch e Fakt dass d Zytige – verlüüre ehrli Chonde,
ou s blotte Girl vo Siite 3 – esch us de Press verschwonde.
Chasch blättere so vöu wet wotsch – es esch verbi met Titte,
deför fendsch i jedem Blatt – im Aecherli si Fritte.

 

D Wiiberhööge

Mer händ immer no ke Gäld ond weder kei Präsi.
Was söll mer nor mache, wo fend mer so en Depp wo de Chaschperli wot mache?
Giger, Zihlme, Peyer, Bossert,... meldet sech öpper ander?
Gottfied Stutz, verreckte Cheib, mer hends jo s letscht Johr scho gseit. Am Schloss chont er doch no, de Schwander. 

*****

Mer drüü Wiiber wänd euch Reider klare Wii ischänke,
euse Präsi tuet üs ofne falschi Fährte länke.
Är het wörkli gueti Grönd, wägem neue Schuelhuus z bocke,
dä armi Maa, het Angst är müess, wäg de Rächtschriibig go nochehocke.

*****

D Badi Reide, es esch leider so, s Gäld fählt a allne Egge,
drom hämmer eus Gedanke gmacht, wie mer sie chönt rette.
Mer send grad als erschts bim neue Bachelor go achlopfe, 
he jo, dä het doch vel Erfahrig bim Löcher stopfe.

 

D'Latzhose

Es macht di ganzi Wält konfus
D Idiote gönd de Amis nie uus,
Nochem Georgli Bush chöigs nömm schlemmer cho
S Gägeteil esch passiert,
jetzt wo de Donald regiert,
E grosse Schrett för ehn, e keine för die Ärde,
das chönnti motiviere in Reide Kandidate z'gwönne,
denn als Präsident muesch hött öberhaupt nüme chönne.

*****

Am Simmi wott nümmi glenge
cha nömme wiit sprenge.
Vor Johre no Doppel-Olympia-Gwenner.
Tuet d Ziel nömme wiit stegge,
jede Sprong tuet abverrege,
landet viel z glii ond werd zom Tief-flieger.
Als Tief-flieger wo de Absprong tuet verpasse esch s verbii,
met dene Eigeschafte wärsch nor im Gmeinrot länger derbi.
 

WC- Ente uf de Badmatte:


De Schwander red vom Rettingsreng
Nor wär söll zahle das komische Deng?
Rond om d Badi sölls gäh es Hotel.
wie wärs schöscht met eme Stondemotel?
«Das wörd Badi weder uf e Höheponkt brenge –
aber ned öbe med schwemme»

*****

För is Reidermoos hed mer de Wäägwiiser vergässe,
velecht esch mer im Sonnekreisel ufem WC gsässe.
Doch wo esch jetzt das WC he?
I de Schuel hemmers leider nonig gseh.
«Schöscht hätte mer jetzt e Schuelruum meh –
zor Verfüegig»

*****

Giftsprötze:

S esch truurig wie no nie
De Badi wott mer de Stöpsu zieh.
Komisch esch s, s wott niemer gseh,
d Gnosseschaft het kei Gäld meh.

D Stötz hett mer för e Chreisu gno,
wo plötzlech vöu, vöu z tüür esch cho.
Komisch esch s, s wott niemer gseh,
s hett i de Gmeinskasse ke Gäud med.

Es Schuelhuus bruchts, es esch ke Frog,
nor was för eis, esch di grossi Sorg.
Komisch esch s, s wott niemer gseh,
S hett i de Boukasse ke Gäld meh.

De Ex-Gmeindrot sorgt för roti Grende,
lot sech fürschtlech lo abfende.
Komisch esch s, s wott niemer gseh
i dere Kasse hetts jetzt ou nü meh.

D Moral vo dere Gschecht,
us wiiblecher Secht:
D Rettig us dere schlemme Not,
esch vom Sawiris es Kaufangebot.

 

 

 

 

 

Plain text

  • Keine HTML-Tags erlaubt.
  • HTML - Zeilenumbrüche und Absätze werden automatisch erzeugt.
  • Web page addresses and email addresses turn into links automatically.